ဆောင်းမဟုတ်သည့်နှင်း (၃) ဇာတ်သိမ်းပိုင်း

“မြရင်က… အေးကြည်မှားတယ်လို့ ထင်ရအောင်၊ မြရင်ဘ၀မှာ အေးကြည်လို မှားခဲ့ဖူးလို့လား။”


သူမ၏ စကားသည် နံဘေးမှာထိုင်နေသည့် ဆာယုရိအတွက် ဘာမှ မထူးဆန်းလှပေမယ့်….. ကျွန်မအတွက်ကတော့ မမြင်နိုင်သည့် အဖြေရခက်သည့်မေးခွန်းစာရွက်ကို ကျောင်းသားလက်ထဲကို ထည့်လိုက်ရသလို ဖြစ်သွားသည်။ တခါတလေ အငြိမ့်သမမှာ သာမန်လူတွေလို အသွေးနဲ့အသား၊ ခံစားတတ်တဲ့ အသည်းနှလုံးရှိတတ်သူတွေမို့ အချစ်ဆိုတာကို လက်သင့်ခံချင် ခံရပေလိမ့်မည်။ ဒါပေမယ့် ဘ၀တစ်ခုအတွက် ရုန်းကန်မှုအတွက် ထိုအချစ်ကို ကြာရှည်အောင် မွေးမြူတတ်ဖို့တော့ အတော့်ကို ခဲယဉ်းပေလိမ့်မည်။


ကျွန်မမှာ သာမန်မိန်းမတွေလို အချစ်ဆိုတာရှိသည်။ ချစ်ရမည့်သူလည်း ရှိသည်။ သို့ပေမယ့် ကျွန်မနှင့် ကျွန်မ၏ချစ်သူသည် လူအများရှေ့မှာ အခုလို တရားဝင်မကြေငြာခဲ့။ ချစ်သူမကျ လင်မယားမကျနေခဲ့သော ကျွန်မတို့နှစ်ယောက်အတွက် လောကကြီးက အစိမ်းသက်သက်ဖြစ်ချင် ဖြစ်နေမည်။ ဒါပေမယ့် အငြိမ့်စင်ပေါ်မှာတော့ ကျွန်မအတွက်နေရာတစ်ခု ကျန်သေးတာအမှန်ပင်။ ထို့အတွက်ကြောင့် အေးကြည်က ကျွန်မကို မှားနေတယ်လို့ ထင်ချင်ထင်နေပေလိမ့်မည်။ သို့ပေမယ့် ကျွန်မတို့သဘင်သည်တွေအတွက် ဘ၀တစ်ခုနှင့် စိန်ခေါ်ပြီးမှ ရွေးချယ်ရမည့် သည်လို အဖြစ်မျိုးက မှန်လားမှားလားဆိုတာ အချိန်ကဆုံးဖြတ်ပေးပါလိမ့်မည်။ အေးကြည်မေးသော မေးခွန်းအတွက် ကျွန်မဆီမှာ အဖြေမရှိသေးတာတော့ အမှန်ပါ။

“မြရင်တို့၊ အေးကြည်တို့ အိမ်ထောင်ကျပြီးရင် အနုပညာသည်လောကကနေ နှုတ်ဆက်ရတော့မှာပေါ့နော်……။”

ရုတ်တရက်မေးလာသော ဆာယုရိ အမေးကို ကျွန်မတို့နှစ်ယောက်စလုံး ပြိုင်တူလိုလို ခေါင်းခါယမ်းရင်း အဖြေပေးလိုက်မိသည်။

“အေးကြည်တို့….. အငြိမ့်မင်းသမီးတွေက အိမ်ထောင်ပြုပြီးလျင်… ကိုယ်မြတ်နိုးတဲ့ .. သည် အနုပညာသည်ဘ၀ကို လွယ်လွယ်နဲ့ မစွန့်လွှတ်တတ်ကြပါဘူး…..။ အိမ်ကယောက်ျား သဘောတူလျင် အငြိမ့်ဆက်ပြီး ကနိုင်ပါတယ်……။ အေးကြည်ကတော့…. မင်္ဂလာမဆောင်ခင်တည်းက … သည်အငြိမ့်ကို ဆက်ကဖို့ ….. မောင့်ကို ခွင့်တောင်းပြီးသားပါ…..။”

အေးကြည်ပြောသော… သူမ၏ချစ်သူသည် သူမတကယ်တမ်း ဆန္ဒရှိသလို သူမ၀ါသနာပါသည့် အငြိမ့်ကို ဆက်ကခိုင်းပါ့မလား။ အငြိမ့်လောကမှာ အငြိမ့်မင်းသမီးတစ်ယောက် နာမည်ကြီးလာပြီဆိုလျင် အတော့်ကို ရန်များသား။ ကောလိပ်ကျောင်းသားလို ဆယ်ကျော်သက်လေးတွေ၊ မနူးမနပ်အရွယ်လေးတွေက အငြိမ့်ကရာ တကောက်ကောက်လိုက်ပြီး အားပေးတတ်ကြသည်။ တခါတလေ ကျွန်မတို့ အငြိမ့်ကရာ တောရွာတစ်ခုပဲ ဖြစ်ဖြစ်၊ မြို့သေးသေးလေးပဲ ဖြစ်ဖြစ် လာရောက်အားပေးကြသည့် မြို့ခံလူကတစ်ဝက်၊ ဘယ်နေရာရောက်ရောက် ကားတွေဖြင့် လိုက်အားပေးကြမည်ဆိုသည့် ကာလသားအမာခံပရိသတ်က တစ်ဝက် ပွဲခင်းထဲမှာ ပြည့်နေတတ်ကြသည်။ အခုလည်း အေးကြည်၏ချစ်သူသည် အေးကြည်ရှိရာ တကောက်ကောက်လိုက်ရင်း အားပေးတတ်သည့် အမာခံပရိသတ်ထဲကပင်ဖြစ်သည်။ အေးကြည်ပွဲကရာ နေရာတိုင်းကို တကောက်ကောက်လိုက်ရင်း အရိပ်တကြည့်ကြည့် ကြည့်နေခဲ့သူတစ်ဦးလည်းဖြစ်သည်။


“အေးကြည်တို့များ….. ကံကောင်းလိုက်တာ…… အိမ်ထောင်ကျပြီးတာတောင်…… ကိုယ်မြတ်နိုးတဲ့ အနုပညာကို ပြသလို့ရသေးတယ်နော်….. ကျွန်မတို့ဂေရှားတွေများကျတော့…. အိမ်ထောင်ပြုလိုက်တာနဲ့ အနုပညာသည်ဘ၀ကို တခါတည်း လက်လွှတ်လိုက်ရရော….. ”


“ကံကောင်းတယ်လို့လဲ… မဆိုသာပါဘူး…ဆယုရိရယ်… တခါတလေတော့လည်း နှစ်ဦးနှစ်ဘက် ညှိရတာပေါ့….. ဒါပေမယ့် မောင်ကတော့ …. ကျွန်မကို နားလည်ခွင့်လွှတ်နိုင်စွမ်းရှိသူတစ်ယောက်မို့လို့ပါ။”

“မဟုတ်သေးဘူး အေးကြည်ရယ်…….. ကျွန်မတို့သဘင်သည်မှာလည်း တချိန်ကျရင် ကိုယ်ချစ်တဲ့သူကို သာမန်လူတွေလို လက်ထပ်ယူထားတယ်ထားဦး….. သဘင်သည်အတွက် လက်ထပ်ထိမ်းမြားခြင်းဆိုတာက စည်းတစ်ခုလိုပါပဲ။ အဲဒီစည်းကို ကျော်မိရင် သဘင်သည် နာမည်ကျရိုးမလား။”

ကျွန်မပြောတဲ့ စကားကို အေးကြည်နားလည်ပါ့မလား။ သူမနားလည်လျင်ရော မိန်းမသားတစ်ယောက်အနေနဲ့ လက်ခံနိုင်ပါ့မလား။ တကယ်တော့ သဘင်သည်ကို လူသိရှင်ကြား ကြည်ကြည်ဖြူဖြူ လက်ထပ်ချင်တဲ့သူကလည်း ရှားသားလေ။ ကျွန်မနှင် ကျွန်မရဲ့ချစ်သူကတော့ အပေးအယူတော့ ရှိပါရဲ့။ ထိုအပေးအယူအတွက် မိန်းမသားတစ်ယောက်အနေနဲ့ ထိုက်တန်ရဲ့လားဆိုတာကိုတော့ ကျွန်မတစ်ခါမှ မတွေးခဲ့ဘူးချေ။

မောင်သည် ကျွန်မဆီခဏခဏလာသည်။ အလှူရေစက်ချရင်တောင် မြရင်သည် သူပိုင်မိန်းမသားဖြစ်ကြောင်းကိုလည်း မဏ္ဏပ်တိုင် တက်ပြချင်နေသေးသည်။ဒါပေမယ့် တစ်ဦးနှင့်တစ်ဦး ချစ်ခင်စုံမက်လို့ လူသိရှင်ကြား ပေါင်းဖက်ကြရဲ့လားဆိုတော့လည်း မဟုတ်ပြန်။ မောင်သည် မျက်နှာကြီး မိသားစုမှမွေးဖွားလာသူပီပီ အရာရာသိုသိပ်သည်။ ကျွန်မကလည်း သဘင်ပညာနှင့် ပါတ်သက်လာလျှင်လည်း အမှားမခံ။ တစ်ဦးတည်း အပျိုလူလွတ်ပမာ၊ လွတ်လွတ်လပ်လပ် လုပ်ကိုင်ရသည်ကို သဘောကျသည်။ ထိုကဲ့သို့ အပြန်အလှန် နားလည်မှုပေးစွမ်းနိုင်ခဲ့တဲ့ ကျွန်မတို့အတွက် အေးကြည်လိုလဲ ဖိတ်စာမရိုက်ခဲ့။ မိန်းမသားတွေ မက်မောသည့် မင်္ဂလာစည်ဗျောကိုလည်း မတီးခဲ့။ ကျွန်မခံယူချက်အတိုင်းသာ ဖြစ်ခဲ့၏။

ကျွန်မအတွက် ယောက်ျားတစ်ယောက်သည် အားကိုးရာတစ်ခုလားလို့ မေးလျင်လည်း ကျွန်မဖြေတတ်။ သာမန်မိန်းမတွေလို ယောက်ျားဆိုရာ ကိုးကွယ်ရာဆိုသည့် စကားကိုလည်း ကျွန်မမယုံကြည်ခဲ့တာအမှန်ပင်။ ကျွန်မအငြိမ့်ကသည်။ အချစ်အကြောင်းတခါတရံဆိုချင်ဆိုမည်။ ဒါပေမယ့် ပွဲသိမ်းပြီးသည့်အခါ ကျွန်မသည် သာမန်မိန်းမတစ်ဦးပမာ ကိုယ့်ကိုယ်ကို ကာကွယ်စောင့်ရှောက်ခဲ့တာအမှန်ပင်။ ဒါပေမယ့် ဆာယုရိဘက်က ကြည့်ပြန်တော့လည်း မဟုတ်ပြန်။

“ကျွန်မတို့ဂေရှားတွေက ခန္ဓကိုယ်ကို ရင်းပြီးအလုပ်လုပ်ရတဲ့သူတွေ မဟုတ်ပါဘူး….. ကိုယ်ကျွမ်းကျင်ရာ အနုပညာနှင့် ဖျော်ဖြေရင်း အသက်မွေးနေသူတွေပါ။ ဒါပေမယ့်လည်း ကိုယ်ဖျော်ဖြေပေးရတဲ့ သူတွေက အမျိုးသားချည်း ဖြစ်နေတော့လည်း လေယူရာပင်နွယ်ယိမ်းသလို……. တခါတလေ စည်းစိမ်တွေနဲ့ ပစ်ပေးရင် ယိမ်းတတ်ကြပြန်ရော…. ဂေရှားတိုင်းက ပညာအခြေ မခိုင်ကြလေတော့လည်း တခါတလေ ယောကျာ်းဆိုတာ သူတို့အတွက် ထွက်ပေါက်ဖြစ်စရာ၊ အားကိုးစရာဖြစ်နေပြန်ရော၊ နောက်ပြီး အိုခီယာမှာတင်နေတဲ့ အကြွေးတွေကိုလည်း လွယ်လွယ်နှင့် မြန်မြန်ဆပ်နိုင်တော့လည်း ယောက်ျားဆိုတာ အားကိုးစရာ ဖြစ်လာပြန်တယ်။”

ဆာယုရိက တွေးတွေးဆဆပြောလိုက်တဲ့ အချိန်မှာ ကျွန်မရော မအေးကြည်ရော နှစ်ယောက်စလုံး နှုတ်ဆိတ်သွား၏။ ကျွန်မတို့ သဘင်သည်တွေခမျာ နာမည်ကြီးလာသည်နှင့် သူတို့ ဂေရှားတွေလို စည်းစိမ်နဲ့ ပစ်ဖမ်းတာ ခံခဲ့ကြသည်။ သဘင်သည်ဆို လွယ်လွယ်ရနိုင်သားပဲ ဆိုသည့်အတွေးဖြင့် လက်တည့်စမ်းဖို့ ကြံကြသည်။

“အို… ဆာယုရိရယ်…… အေးကြည်တို့ဘ၀တွေလည်း အတူတူပါပဲ။ တခါတလေ ပင်ပမ်းလွန်းလို့… နားခိုရာ…ရလေမလားလို့… ကိုယ်မှီရာဆွဲလိုက်ပေမယ့်လည်း….. ကိုယ်ဆွဲတာ မခိုင်တဲ့အရာဖြစ်နေတော့လည်း ၀ုန်းခနဲ ကျပြန်ရော……..”

ဟုတ်တယ်။ အေးကြည်ပြောသလို ၀ုန်းခနဲကျတယ်ဆိုတာမှန်သည်။ ဒါပေမယ့် ဆွဲတဲ့သူကလည်း အကင်းမပါးလေတော့ အခုလို ၀ုန်းခနဲကျတာလည်း မဆန်းပါဘူး။ ဒါဆိုရင် အေးကြည်ကပဲ အဆွဲကောင်းလို့လား၊ ဒါမှမဟုတ် အဆွဲခံလိုက်ရသည့် အရာကပဲ ခိုင်ခံ့လွန်းလို့လား မသိ အငြိမ့်သမတွေအလယ်မှာ အေးကြည်တစ်ယောက် မင်္ဂလာပွဲတစ်ခုနဲ့ပင် ခေါင်းမော့နိုင်ပြိပေါ့။ အဲဒါကိုပဲ စစ်မှန်သည့် အချစ်လို့ခေါ်မလား။

အချစ်.. အချစ်…. အေးကြည်လည်း ချစ်တတ်သည်။ ဆာယုရိလည်း အချစ်ကို မျှော်လင့်ရင်း သူမ၏ချစ်သူကို တိတ်တိတ်လေး စောင့်စားနေသည်။

“မြရင်က အချစ်ကို နားမလည်ပါဘူးကွာ…..”

တိုနေပြီဖြစ်သော စီးကရက်လေးကို နှုတ်ခမ်းပေါ်ချိတ်ရင်း ခပ်ထေ့ထေ့လေး ပြောလိုက်သည့် အေးကြည်၏ စကားသည် ကျွန်မနားထဲကို အူပြီး ၀င်လာသည်။ ဇာတ်စင်ပေါ်ရောက်လျင် ညုလည်းမညု ခရာတာတာလည်းမပြော တည်တည်ပြုံးပြုံးလေး နေတတ်သော ကျွန်မကို သိပ်ဟန်ဆောင်ကောင်းတာပဲလို့ သဘင်သည်အချင်းချင်း မေးငေါ့ရင်း ပြောတတ်သည့် အဖြစ်ကို ကျွန်မမျက်ကွယ်ပြုနိုင်ပေမယ့် တစ်ယောက်အကြောင်း တစ်ယောက်နားလည်သော အေးကြည်က ပြောလာသည့်စကားကိုတော့ ကျွန်မလက်မခံချင်ပါ။

“ကြည်က… မျက်စိစုံမှိ်တ်ပြီးခံစားတတ်တဲ့ အချစ်ကို အချစ်တစ်ခုလို့ သတ်မှတ်ချင်လို့လား…… ဆာယုရိလို ဘယ်အချိန်မှာမှ နီးနိုင်ပါ့မလဲဆိုတဲ့ မျော်လင့်ချက်နဲ့ ဘ၀ကိုစီးမြောတတ်တဲ့သူတွေကိုမှ အချစ်လို့ ခေါ်မှာလား။ အဲဒါမှမဟုတ်ဘဲ ဘ၀ကို ယုံယုံကြည်ကြည် ပုံအပ်ပေးနိုင်မယ့်သူကိုမှ အချစ်လို့ခေါ်မှာလား။ လူတိုင်း… လူတိုင်းမှာ အချစ်ဆိုတာ ခံစားချက်ခြင်းမတူပါဘူး”

သည်နေရာမှာ ကျွန်မအသံမာကောင်း မာပေလိမ့်မည်။ ဒါပေမယ့် ကျွန်မကို အချစ်မရှိတဲ့ မိန်းမတစ်ယောက်လိုတော့ အထင်မခံနိုင်ပါ။

“ဒါဆို… မြရင်ချစ်တဲ့ အချစ်က ဘယ်လိုမျိုးလဲ”

တိုးတိတ်စွာမေးလာသည့် ဆာယုရိ၏ မေးခွန်းကို ဖြေဖို့ ကျွန်မအတွက်တော့ သိပ်မခက်ပါဘူး။

“အချစ်ဆိုတာ ငယ်နုတဲ့အချိန်ပဲ ရူးသွပ်လို့ကောင်းတာ။ တကယ်တမ်း ဘ၀ကို တည်ဆောက်လိုက်တဲ့အချိန်မှာ အချစ်ဆိုတာ အရင်ကလောက် နေရာမယူနိုင်တော့ပါဘူး။ ကျွန်မလည်း… သာမန်မိန်းမတွေလို ချစ်တတ်တာပဲ…..။ သာမန်မိန်းမတွေလိုပဲ အချစ်နဲ့လက်တွဲပြီး လမ်းလျှောက်ချင်တာပဲ… ဒါပေမယ့် သဘင်သည်ဘ၀မှာ ကျွန်မတို့တတွေက အပြင်ကမိန်းမတွေလောက်မှ လွတ်လပ်ခွင့်မှ မရကြတာ…..။ အဲဒါကိုလည်း မောင်ကနားလည်တယ်။”

ကျွန်မ၏ခံယူချက်ကိုကြားတော့ အေးကြည်တို့က ခါးခါးသီးသီးမဟုတ်ပေမယ့် သိပ်ပြီး လက်မခံချင်။

“ဒါဟာ မိန်းမတစ်ယောက်အတွက် သိပ်ပြီး တန်ဖိုးလျော့နေမှာပေါ့”

တန်ဖိုးဆိုတဲ့ စကားကို ကျွန်မထပ်သလဲလဲ ရွတ်မိပြန်သည်။ ယောက်ျားတစ်ယောက်နှင့် နားလည်ကြင်နာယုယစွာ အတူနေထိုင်ခြင်းက မိန်းမတစ်ယောက်ရဲ့ တန်ဖိုးကို ကျစေခြင်းတဲ့လား။ ဆာယုရိကလည်း အေးကြည်လိုပဲ မြင်ပြန်သည်။ သုံးယောက်မှာ အများပြောတာအမှန်ဆိုလျင် နှစ်ယောက်တစ်ယောက်ဖြစ်နေသည့် ကျွန်မအတွက်ကလည်း အမှားဖြစ်နေရော့သလား။

တကယ်တော့ ကျွန်မသည် တခြားအငြိမ့်မင်းသမီးတွေလို အငြိမ့်စင်ပေါ်မှာ ခရာတာတာ ရင်ဖိုစရာမပြောတတ်။ ကျွန်မပညာဖြင့် ကျွန်မဘ၀ကို ထိန်းသည်။ သဘင်သည်ဘ၀မှာ လက်ထပ်ခြင်းဆိုသည်က အနည်းနှင့်အများတော့ အထိအခိုက်များတတ်တာ ကျွန်မနားလည်သည်။ ထို့ကြောင့်ပင် ကျွန်မ၏အိမ်ထောင်ရေးကို အေးကြည်လို မဏ္ဏပ်ထိုးပြီး လူသိအောင်မကြေညာခဲ့။ ထိုသို့ မကြေညာခြင်းအတွက် ကျွန်မ၏ဂုဏ်သိက္ခာကို ကျနိုင်သည်ဆိုလျှင် ထိုသိက္ခာကို ကျွန်မ၏သဘင်ပညာက ပြန်ဆွဲတင်ပေးလိမ့်မည်။

အခုတော့လည်း ကျွန်မတို့ သုံးယောက်မှာ နှစ်ယောက်တစ်ယောက် ဖြစ်လာသည်။ အေးကြည်နှင့် ဆာယုရိသည် အိမ်ထောင်ရေးတစ်ခုကို သာမန်မိန်းမတွေလိုပဲ လမ်းရိုးတစ်ခုပမာ လျှောက်သင့်သည်လို့ထင်ကြသည်။

“မြရင်ကတော့ …. အိမ်ထောင်ရေးဆိုတဲ့လမ်းကို အမျိုးသမီးတိုင်း တူညီစွာ လျှောက်နိုင်လိမ့်မယ်လို့ မယုံဘူး။ ဘာကြောင့်လည်းဆိုတော့ လူတိုင်းရဲ့ ဘ၀ရပ်တည်ချက်တွေက မတူညီကြလို့ပဲ”

“ကြည်ကတော့ အမျိုးသမီးတိုင်းမှာ သင့်တော်တဲ့ အိမ်ထောင်ဘက်ကို လူကြီးစုံရာရှေ့မှာ တင့်တောင်းတင့်တယ် လက်ထပ်ယူသင့်တယ်လို့ထင်တယ်….။ ဆာယုရိရော ဘယ်လိုထင်သလဲ…။”

“မအေးကြည်.. မြင်သလို… ကျွန်မလည်းမြင်တယ်။အဖြူရောင် သတို့သမီးဝတ်စုံကီမိုနိုအောက်က ပျော်စရာကောင်းမယ့် မိန်းမတစ်ယောက်ဖြစ်ရမှာကိုလည်း ကျွန်မကတော့ စိတ်ကူးယဉ်မိတာအမှန်ပဲ……”

အင့်ဟင်း…… မင်္ဂလာပွဲကို ခမ်းခမ်းနားနားကျင်းပပြီး သတို့သမီးဝတ်စုံ ၀တ်လိုက်တော့မှ မိန်းမတစ်ယောက်ပီသရတော့မှာလား။ ဒါဆိုလျင်တော့ အဲဒီလိုမိန်းမပီသနိုင်ဖို့ ကျွန်မအတွက် အခွင့်အရေး ပါလာနိုင်လိမ့်မည်ဟု မထင်ပါဘူး။ လူတိုင်းမှာတော့ အိပ်မက်လေးတွေကိုယ်စီ ရှိကြပါသည်။ ဒါပေမယ့် ထိုအိပ်မက်လေးတွေအတိုင်း လူတိုင်း ဖြစ်ခွင့်မရနိုင်ကြပေ။ ကျွန်မရဲ့ အိပ်မက်တွေကလည်း သာမန်မိန်းမတစ်ယောက်မျိုးရဲ့ အိပ်မက်မျိုး၊ ဆာယုရိနှင့် အေးကြည်တို့လို အိပ်မက်မျိုး ဖြစ်ချင်ဖြစ်မည်။ သို့ပေမယ့် ကျွန်မကတော့ အိပ်မက်တွေကို သည်အတိုင်းသာ သိမ်းထားခဲ့ပြီး ထုတ်ပြချင်သူတစ်ယောက် မဖြစ်ခဲ့ပေ။ ကျွန်မက လက်တွေ့ဘ၀ကို ယုံယုံကြည်ကြည် တည်ဆောက်မိသူ တစ်ဦးသာ ဖြစ်မည် ထင်သည်။

ကျွန်မတို့စကားဝိုင်းလေးသည် မထင်မှတ်ဘဲတိတ်ဆိတ်သွားကြသည်။ ကျွန်မတို့ သုံးယောက်စလုံးဆီမှ ၀င်သက်ထွက်သက်များသည် လေခိုးငွေ့အေးအေးလေးများပမာ စီးမျောထွက်ကုန်သည်။ နောက်ပြီး သုံးယောက်ကြားမှာ စီးမျောသွားသည့် အချိန်တွေကလည်း မတူကြ။ ဘာတွေဖြစ်ကုန်ကြပြီလဲ။ ကျွန်မတို့သုံးယောက်သည် မည်သူက ပိုပြီး မိန်းမဆန်လေမည်ဟူသော အတွေးဖြင့် တစ်ယောက်ကို တစ်ယောက်မလွတ်တမ်းကြည့်နေကြသည်။ တစ်ယောက်အမှားကို တစ်ယောက်ထောက်ဖို့ အသင့်ဖြစ်နေကြပြီလား။

ကြည့်နေရင်းနှင့် အခန်းကျဉ်းလေးသည် တဖြေးဖြေးမှောင်လာသည်။

တစ်ယောက်အသက်ရှူသံ တစ်ယောက်ပြန်ကြားနေရသည်။

အေးစက်နေသောလေတို့ တကျော့ပြန်ဝင်လာပြန်သည်။ အင့်ဟင်း မိန်းမတစ်ယောက်အတွက် ခမ်းနားကြီးကျယ်စွာ လက်ထပ်ယူခြင်းက ထိုမိန်းမတစ်ယောက်၏ အနုပညာအတွက် ကျဆုံးခြင်းသက်သက်……။

အို… ကျွန်မဘာတွေ စဉ်းစားနေတာလဲ။ တစ်ချိန်တစ်ခါမှာတော့ မိန်းမတိုင်းက တန်ဖိုးကြီးစွာဖြင့် လှပသော သတို့သမီးဝတ်စုံကို သူချစ်သောသူဖြင့် လက်တွဲရင်း ၀တ်ဆင်ချင်ကြသတဲ့လား။

အေးကြည်၏ စကားသံလေးက လေအေးထဲကို ဖောက်ထွက်ပြီး ကျွန်မရင်ထဲကို ဒိန်းခနဲ ၀င်စောင့်သည်။ နောက်တော့ ပတ်ချာလည်လှည့်သလို ကျွန်မခန္ဓာကိုယ်ထဲကို တွန်းတိုက်ရင်း ၀င်ရောက်ပျောက်ကွယ်သွားပြန်သည်။

အေးစက်သောလေထဲမှာ မွှေးကြိုင်တဲ့ရနံ့လေးက စီးဝင်လာသည်။ အနားကို ပတ်ချာလည်ရှာကြည့်လိုက်သည့်အချိန်မှာ ဆာယုရိရော အေးကြည်ရော မရှိတော့။ ဘယ်ရောက်သွားကြပြီလဲ။ သနပ်ခါးနံ့သင်းသင်းလေးကို တစ်ချက် နမ်းရှိုက်လိုက်သည့်အချိန်မှာ မိမိလက်အစုံမှာ ဆုပ်ကိုင်ထားသည့် အဖြူရောင် ဖိတ်စာလေးသာဖြစ်နေသည်။ ထိုဖိတ်စာလေးသည် ကျွန်မကို လှောင်ပြီး ကြည့်နေသည်။ ရယ်သံတွေကို ခပ်တိုးတိုးလေးကြားရပြန်သည်။

ကျွန်မကြောက်လန့်တကြား ဖိတ်စာလေးကို လွှတ်ချလိုက်မိသည့်အချိန်မှာ ထိုဖိတ်စာလေးသည် ၀ဲကာဝဲကာဖြင့် တဖြေးဖြေးကျသွားပြီး မိန်းမတစ်ယောက် ဖမ်းဆုပ်လိုက်တာ တွေ့လိုက်ရသည်။ ထိုမိန်းမကိုကြည့်လိုက်တော့ လူတစ်ရပ်လောက်ရှိသော သူမ၏ဆံပင်တွေက ခေါင်းအုံးထပ်မှာ ပြန့်ကြဲနေပြီး ကျွန်မလွှတ်ချလိုက်သော ဖိတ်စာလေးကို တင်းတင်း ဆုပ်ကိုင်ထားသည်။ အေးကြည်၏ဖိတ်စာအသစ်လေးသည် သူမလက်ထဲမှာ ၀ါကျင်တွန့်လိမ်နေပြီး နှစ်ပေါင်းများစွာကြာနေတဲ့ စက္ကူစုတ်လေးလို ညစ်နွမ်းနေသည်။ သူမနှင့် ထိုဖိတ်စာလေးသည် တစ်ခုခုဆက်နွယ်နေသည်ဟု ကျွန်မ ရုတ်တရတ်ခံစားလိုက်ရသည်။ သူမသည် ထိုဖိတ်စာလေးကို တင်းတင်းဆုပ်ထားရင်း နောက်ဆုံးထွက်သက်ကို အမိအရဖမ်းနေသကဲ့သို့ တဆတ်ဆတ်တုန်နေ၏။

အို…… အလင်းရောင်ခပ်ဖျော့ဖျော့အောက်က သူမ၏မျက်နှာလေးကို သေသေချာချာ ကြည့်မိလိုက်ချိန်မှာတော့ ကျွန်မကို အေးစက်သည့်လက်တွေဖြင့် ပွေ့ဖက်လိုက်သလို ခံစားလိုက်ရသည်။

သူမသည် ကျွန်မကိုယ်တိုင်ဖြစ်နေသောကြောင့်ပင်။

၁၃ စက်တင်ဘာ ၂၀၀၉
၁း၂၃ မနက်

ဝတ္ထုပါဇာတ်ကောင်များသည် မြန်မာ့အငြိမ့်လောကမှ ဖြစ်ရပ်မှန်ဇာတ်ကောင်များကို မှီငြမ်းထားခြင်း ဖြစ်ပါသည်။ ဇာတ်ကောင်များ၏ စိတ်ခံစားမှုများသည် စာရေးသူ၏ စိတ်ကူးယဉ်သက်သက်များသာ ဖြစ်ပါသည်။

လေဘာတီမမြရင်သည် သဘင်ပညာကို အလွန်ပဲ ကျွမ်းကျင်တတ်မြောက်သူ တစ်ဦးဖြစ်ပြိး အငြိမ့်စင်ပေါ်တွင် မည်သည့်အခါမျှ မကလက်တတ်။ သူမ၏မျက်နှာကို အငြိမ့်စင်ပေါ်မှလွဲ၍ အပြင်တွင် မြင်နိုင်ခဲလှသည့် အိနြေကြီးသည့် အမျိုးသမီး တစ်ဦးဖြစ်သည်။ သူမ၏ အငြိမ့်ကို မိဘ၊ သားသမီး အတူတူပင်ကြည့်နိုင်ကြသည်။ သူမအိမ်ထောင်ပြုသည့်အခါ ထင်ထင်ပေါ်ပေါ် မပြုခဲ့ပေ။ ငွေကိုလည်း ကိုင်မသုံးတတ်ပဲ သူမ၏မိခင်က အစစအရာရာ စီမံပေးသည့်အတိုင်း မြေ၀ယ်မကျနားထောင်သည်။ ဒုတိယကမ္ဘာစစ်အတွင်း စစ်ပြေးရင် ငှက်ဖျားရောဂါဖြင့် သေဆုံးခဲ့သည်။ သူမသေဆုံးပြီး ၅ရက်အကြာတွင် သူမ၏မိခင်ပါ သမီးဇောဖြင့်သေဆုံးခဲ့သည်။

ဥက္ကလာအေးကြည်သည် မမြင်ရင်ထက်နှိုင်းယှဉ်လျင် သဘင်ပညာ ပိုပြီး ပြည့်ဝသူဖြစ်ကြောင်း ပညာရှင်တိုင်းလက်ခံကြသည်။ နောက်ပြီး မမြရင်ထက် အငြိမ့်လောကထဲ စောစီးစွာ ရောက်ခဲ့သည်။ သူမ၏ ပရိသတ်ထဲက တစ်ဦးဖြစ်သူနှင့် လူသိရှင်ကြား လက်ထက်ပြီးနောက် အငြိမ့်လောကမှ ထွက်ခွာသွားခဲ့သည်။ တခါတရံ အရေးကြီးသောပွဲများမှအပ ဆက်ပြီး မကတော့ပါ။ သူမသည် လူ့လောကကြီးထဲမှ သူမ၏ယောကျာ်းထက် စောစီးစွာထွက်ခွာ သွားခဲ့သော်လည်း သူမ၏ယောက်ျားသည် နောက်အိမ်ထောင် ပြုခြင်း မရှိခဲ့ပါ။

ဥက္ကလာအေးကြည်နှင့် မမြရင်တို့၏ အိမ်ထောင်ရေး ယူဆချက်များသည် သဘင်လောကအတွင်း ဆွေးနွေးစရာတစ်ခုဖြစ်လာခဲ့သည်။

ဆာယုရိသည် သူမကိုးနှစ်သမီးကတည်းက တိတ်ဆိတ်စွာ စောင့်စားလာခဲ့ရသော ချစ်သူဖြင့် ဒုတိယကမ္ဘာစစ်အပြီးမှာ ဆုံစည်းခွင့်ရခဲ့သည်။ (အသေးစိတ်ကို ဂေရှားနှင့်အနုပညာမှာ ဖတ်နိုင်ပါသည်။)