သံယောဇဉ်အလွန် (၂)

အပိုင်း (၁) ကို ဒီမှာ ဖတ်နိုင်ပါသည်။

အဲဒီနေ့ညက ရန်ကုန်သင်္ကြန်သည် မခမ်းနားတော့။ မာကျူရီညမီးရောင်တို့က မတောက်ပသလို သင်္ကြန်လေညင်းတို့ကလည်း မနူးညံ့တော့။ ကျွန်တော် သူ့ရဲ့ ဟန်းဖုန်းကို မပြတ်ခေါ်နေသော်လည်း အမြဲတမ်းသူ့ ဖုန်းလိုင်းက မအား။ ဘာတွေ ဖြစ်တာလဲ။ ဖုန်းလိုင်းတွေကပဲ ကြပ်နေလို့လား။ ဒါမှမဟုတ် တစ်ယောက်ယောက်နဲ့ စကားပြောနေလို့လား။ ဒါမှမဟုတ် သူ့ရဲ့ချစ်သူကပဲ စိတ်ကောက်နေလို့ ဖုန်းနဲ့ချော့နေရတာလား။ အတွေးတွေ။ ဒီအတွေးတွေမလိုချင်တော့။ စိတ်ကူးမှာ နွမ်းလျလှပြီ။ စောင့်နေခဲ့တဲ့ ဒီရက်ကလည်း ကြာလှပြီ။

ကြိုးစားပမ်းစားနဲ့ ဖုန်းကို ဆက်ပြီး နှိပ်လိုက်တော့မှ သူ့ဆီကို တန်းခနဲ ၀င်သွားသည်။

ဟယ်လို………….။
ဟယ်လိုတဲ့…။ ကျွန်တော် ဒီအသံလေးကြားရဖို့ ဘယ်လောက်တောင် ကြာကြာခေါ်နေရလဲ။ သူ သိရဲ့လား။

ငါပါ….။ ဖုန်းခေါ်နေတာ။ လိုင်းမအားလို့။ ချက်ချင်းမရဘူး။
ဟုတ်တယ်။ ရဲမင်းနဲ့စကားပြောနေတာ။

ရဲမင်းနဲ့ စကားပြောနေတာ ဒီလောက်တောင်ကြာရလား။ စိတ်ထဲက ပြောလိုက်ပေမယ့် နှုတ်ဖျားမှ ဘာမှ မထွက်လာ။

ရဲမင်းက သင်္ကြန်အတက်နေ့ ပုသိမ်ကိုလာခဲ့မယ်တဲ့။ အဲ့ဒါ………….။

သူငယ်ချင်းတွေပဲ……. အတူတူလာခဲ့လေ။

ငါ.. အတူတူမလာချင်ဘူး…..။ အေးအေးဆေးဆေး နှစ်ယောက်ထဲတွေ့ချင်တာ……………..။

တစ်စက္ကန့်….။ နှစ်စက္ကန့်……။ သူခဏငြိမ်သွားတယ်။ နောက်တော့ သူစကားစပြောတယ်။ ဒီတစ်ခါတော့ ရဲမင်းအကြောင်းမဟုတ်တော့။

မင်းလာမယ့်အကြောင်း…။ ငါ့အိမ်ကို ပြောပြသေးလား…….။

ဒီမေးခွန်းကို ကြားလိုက်ရတဲ့ အချိန်မှာ ကျွန်တော်ဘာဆက်ပြောရတော့မလဲ မသိတော့။ တစ်ချိန်က ပြဿနာ…..။ အဲ့ဒီပြဿနာတစ်ခုက ငွေဆောင်နဲ့ မဝေးလှတဲ့ ကမ်းခြေလေးတစ်ခုမှာ ပေါက်ကွဲခဲ့ဘူးသည်။ ဒီတစ်ခါလည်း ပေါက်ကွဲဦးမှာလား။ သူ့ အိမ်နဲ့ ကျွန်တော်က စားအိမ် သောက်အိမ်တွေလိုပဲလေ။ ဒီတစ်ခေါက်လည်း ကျွန်တော် သူ့ဆီ သွားလည်မယ်လို့ ရိုးရိုးသားသားပြောပြခဲ့တာ ဘာဆန်းလဲ။

ဘာလို့ ငါ့အိမ်ကို သွားပြောရတာလဲ။ ငါ့အိမ် အကြောင်းလဲ သိသားနဲ့။

ဒီတစ်ခါတော့ သူ့စကားက မေးခွန်းမဟုတ်တော့သလို အဖြေတစ်ခုလည်း မဟုတ်တော့။ ဒီစကားရဲ့ နောက်ကွယ်မှာ ဘာတွေဖြစ်နေပြီလဲ ဆိုတာ သူ မပြောပြပေမယ့် ကျွန်တော် သိနေတယ်လေ။ ၂၅နှစ်ကျော်ပြီဖြစ်တဲ့ ဒီအရွယ်မှာ ဘာလို့များ မိဘတွေရဲ့ အရိပ်တကြည့် လိုက်ကြည့်ချင်းက ရှိနေသေးတာလဲ။ ဟိုတုန်းက ဆယ်တန်းကျောင်းသား ဘ၀မို့လို့ ချုပ်ချယ်ချင်ရင်လည်း ထားပါတော့လေ။ အခုတော့……. ။

ကျွန်တော်တို့နှစ်ယောက်ရဲ့ စကားဝိုင်းလေးက အသက်မပါတော့။ စကားလုံးတိုင်းက ခြောက်ကပ်လို့နေတယ်လေ။ ဒီစကားလုံးတွေက အရင် ဆယ်တန်းအောင်စက ပြောခဲ့သလို။ မိဘတွေရဲ့ မျက်စိအောက်မှာ တင်းကျပ်လို့နေတုန်းပါပဲ။

အခန်း(၂)

မနက်မိုးလင်းတော့ ညတုန်းက အတွေးတွေကြောင့် ကောင်းကောင်းအိပ်မပျော်ခဲ့ဘူး။ နေလောင်ခံ လိုးရှင်းတစ်ခုကို ခြေဆုံးခေါင်းဆုံးလိမ်းလိုက်ပြီး… အင်းယားလမ်းက GODကို တက္ကစီ ငှားပြီး ထွက်လာလိုက်သည်။ တာမွေဘက်ကနေ ကားကို ဖြတ်မောင်းတော့ ရေကစားနေကြသူများကို ခပ်ကြဲကြဲပဲ တွေ့ရသည်။ ဘယ်လိုဖြစ်တာလဲ။ သင်္ကြန်အကြတ်နေ့တောင် ဖြစ်နေပြီ။ ၅နှစ်အတွင်းမှာ ရန်ကုန်သင်္ကြန်က ခြောက်ကပ်ကပ်နိုင်လှချည်လား။

အင်းယားလမ်းထဲကို ကားဆက်မ၀င်နိုင်တော့လို့ မာလာဆောင်ရှေ့ကနေ တော်တော်လေး
လမ်းလျှောက်လိုက်ရသည်။ မဏ္ဍာပ်ပေါ်ရောက်တော့ သီချင်းသံတွေကြားမှာ ညက အမောတွေ ပျောက်သွား၏။ ကိုယ့်အတွေးနဲ့ကိုယ် ကိုယ့်စည်းချက်နဲ့ကိုယ် လူးနေရင်း မိန်းကလေး တစ်ယောက် ကျွန်တော့်ရှေ့မှာ လာရပ်သည်။ သူမသည် ကျွန်တော့်ကို တစ်ချက်ပြုံးပြလိုက်ပြီး ကျွန်တော့်စည်းချက်တွေကြားကို ၀င်လာသည်။ သူမရဲ့ အရပ်က ကျွန်တော့် အရပ်နဲ့ မတိမ်းမယိမ်းရှိပြီး ညိုစိမ့်စိမ့်နဲ့ တော်တော်ချစ်စရာ ကောင်း၏။ သူမနဲ့ ကပြီးနောက် ကျွန်တော် မဏ္ဍာပ်ပေါ်မှာ ရှိတဲ့ တခြားတစ်ယောက်နဲ့ ပြောင်းကလိုက်သေးသည်။ ကျွန်တော် နောက်ကို ပြန်လည့်လိုက်တဲ့အချိန်မှာ သူမကကျွန်တော့် နောက်နားမှာ ကပ်လျှက်ရှိနေတုန်း။ ဒီလိုနဲ့ပဲ တွဲက ဖြစ်ပြန်ရော။ နောက်တော့ နာမည်တွေ ချိန်းကျတယ်လေ။ သူ့နာမည်က ဧပရယ်တဲ့။ လှလိုက်တဲ့ နာမည်လေး။ ဒီလိုနဲ့ သင်္ကြန်ရဲ့ ပထမအကြတ်နေ့မှာ အရမ်းခင်စရာကောင်းတဲ့ ဧပရယ်။ နောက်ပြီး ဘောလုံးဆိုတဲ့ ကောင်လေးရယ်။ ကျွန်တော်တို့ သုံးယောက်တတွဲတွဲ ဖြစ်သွားကြသည်။

တကယ်တော့ ဒီခင်မင်မှုတွေက တစ်ခုခုကိုသယ်လာတာ အစက မရိပ်မိခဲ့ဘူး။
ဧပရယ့်ရဲ့ ခင်မင်မှုတွေက တစ်ခုခုနက်ရှိုင်းနေသလို။ တစ်ချက်တစ်ချက် ကျွန်တော့်ကို စူးစိုက်ကြည့်လိုက်တဲ့ မျက်ဝန်းနက်နက်တွေ ကြားမှာ သံယောဇဉ်တစ်ခုခုက ကပ်ပါလာသလိ်ုလို။

ဒုက္ခတစ်ခု။ နောက်ထပ် ဒုက္ခတစ်ခုကို ဘယ်သူ့ကိုမှ မပေးလို။ ကျွန်တော့် သက်ပြင်းမသိမသာချရင်း ဧပရယ့် အကြည့်တွေကို မသိမသာရှောင်နေခဲ့၏။ ညနေခင်းဘက်ကို သမ်းလုလုအချိန်မှာ မဏ္ဍာပ်ပေါ်က လူတွေ အားလုံး ရေချိန်ကိုက်နေကြပြီ။ ဘောလုံးကြောင့် ဧပရယ်လည်း ထွေထွေဖြစ်နေသည်။ ယိုင်တော့ မလိုလို ဖြစ်နေတဲ့ ဧပရယ့်ကို ဘောလုံးနဲ့ အတူတူ ဖေးမလိုက်ရင်း မဏ္ဍာပ်စင်ပေါ်က ရေပန်းတွေ အောက်ကို အမူးပြေရပ်ခိုင်းလိုက်၏။ ဧပရယ်က ကျွန်တော့်ကို စိုက်ခနဲ ကြည့်လိုက်ပြီး ကျွန်တော့်ကို မနေ့ကတည်းက သတိထားမိပြီး သဘောကျနေတာတဲ့လေ။

ကျွန်တော်က ဧပရယ်ပြောတာကို ဂရုစိုက်နားမထောင်ဖြစ်။ ငိုက်ဆိုက်ကျချင်နေတဲ့ သူမရဲ့ခေါင်းကို ရေပန်းတွေအောက်ကို ထိုးခံပေးလိုက်သည်။ ဒါပေမယ့် စိတ်ထဲကတော့ တိုးတိုးလေး ပြောလိုက်မိသည်။ အချစ်ဆိုတဲ့အရာကို နင်ဘယ်လောက်တောင် နားလည်လို့လဲ ဧပရယ်ရယ်……….။ အချိန်တန်တော့လည်း အားလုံးက ပြီးဆုံးသွားမှာပါ။ ဟုတ်တယ်။ သင်္ကြန်ပြီးတာနဲ့ အားလုံးက ပုံမှန်ပြန်ဖြစ်သွားမှာပါ။

ဒီလိုနဲ့ပဲ သင်္ကြန်ရက်တစ်ရက်သာ ကုန်ဆုံးတော့မည်။ ကျွန်တော့် ဟန်းဖုံးလေးကို ကြည့်လိုက်တော့ ဘာMiss Callမှ မရှိ။ လက်ချောင်းလေးတွေက အလိုလို နံပါတ်တစ်ခုခုကို နှိပ်လိုက်တော့လည်း ကိုင်မယ့်သူမရှိ။ နေ့လည်အခါ သင်္ကြန်သီချင်းသံတွေနဲ့ ပြာလောင်ခတ်နေသလောက် ညအခါ တိတ်ဆိတ်လှချည်လား။ ရန်ကုန်သည် ဟိုးအရင်တုန်းကလို တက်တက်ကြွကြွမရှိတော့။ ဒီလိုပါပဲ။ ခေါ်သူမဲ့ တိတ်ဆိတ်နေတဲ့ ဖုန်းလေးကို နံဘေးမှာ ချထားရင်း အိပ်ပျက်ခဲ့ရပြန်ပြီ။

…………………………………………။…………………………………………..

ဒုတိယအကြတ်နေ့။ ဒီနေ့တော့ မနက်မိုးလင်းတာနဲ့ တူးပို့သံတွေနဲ့ စိုင်းစိုင်းရဲ့ အိုးကလေးလှုပ်ပါဦး အသံတွေက နားထဲကို ပြေးဝင်လာသည်။ မိုးလင်းခါနီးမှ အိပ်ပျော်သွားလို့ အိပ်ရေးမ၀တဲ့ မျက်လုံးတွေက ကြိမ်းစပ်စပ်။ ခနာကိုယ် တစ်ခုလုံးကလည်း ကိုင်ရိုက်ထားသလို နာလှ၏။ အိမ်ရှေ့ဝရန်တာကို ထွက်ကြည့်လိုက်တော့ အိမ်ရှေ့ ကားလမ်းပေါ်မှာ ၀ီစီသံမျိုးစုံနဲ့ ရေပက်ခံကားတွေ တန်းစီနေကြပြီ။

ကျွန်တော်လည်း အမလုပ်ပေးထားတဲ့ မနက်စာကို ကပျာကယာစား။ အ၀တ်အစားလဲပြီး GOD ကို သုတ်ခြေတင်ရ၏်။ အင်းယားလမ်းအ၀င်ရောက်တော့ တစ်လမ်းလုံးရေတွေ လွှမ်းပြီး ဒူးဆစ်အထိ ရေတွေမြုပ်နေပြီ။ GOD ပေါ်ရောက်တော့ ဧပရယ်က ရောက်နှင့်နေသည်။ ရောက်ရောက်ချင်းပဲ သူမက ကျွန်တော့်ကို မျှော်နေသည်တဲ့။

ဒီလိုနဲ့ပဲ ပိုက်နှစ်ချောင်းလောက်ကို နှစ်ယောက်သား လက်က ပူးကိုင်ရင်း လာသမျှကားတွေကို အမိအရပက်ကြသည်။ အဲဒီအချိန်မှာ သူငယ်ချင်းတစ်ယောက်က ကျွန်တော့် ပုခုံးကို ပုတ်လိုက်ရင်း လူတစ်ယောက် ကျွန်တော့်ကို လာရှာနေတယ်တဲ့။ ကျွန်တော်ကြည့်လိုက်တော့ ရဲမင်းက မဏ္ဍာပ်အောက် ရောက်နေ၏။

ကျွန်တော်လည်း မဏ္ဍာပ်အောက်ကို ဆင်းပြီး ရဲမင်းနဲ့ စကားပြောဖြစ်သည်။ ရဲမင်းက ပုသိမ်ကို သွားဖို့ ကားလက်မှတ်ဝယ်ပြီးပြီတဲ့။ ကျွန်တော် သူ့ကို ကြည့်ပြီး စိတ်တော်တော်ညစ်သွားသည်။ နောက်တော့ ကျွန်တော်က သူ့ကို ငါတစ်ယာက်တည်း သွားချင်တယ်။ မင်းနောက်မှ သွားလို့မရဘူးလားလို့ မေးလိုက်သည်။ သူကလည်း သူ့အကြောင်း ပြချက်နဲ့လေ။ သူစင်္ကာပူသွားတော့မှာ မို့လို့ နောက်ဆုံးတစ်ခေါက် သွားနှုတ်ဆက်ချင်တယ်တဲ့။ ကျွန်တော် ဘယ်လိုလုပ်ရမလဲ။ ခေါင်းပေါ်ကို ရုတ်တရက် တဝေါဝေါကျလာတဲ့ ရေတွေကို ရှောင်လိုက်ရင်း…။

မင်းသွားချင်ရင်သွား။ မင်းသွားရင် ငါ မသွားဘူး။ ငါသွားရင်တော့ မင်းမလိုက်ခဲ့နဲ့။

ရဲမင်းက ကျွန်တော့်ကို အသိရခက်နေတဲ့ မျက်လုံးတွေနဲ့ ငေးကြည့်နေရင်း သူဘာလုပ်ရမှန်းမသိတော့။ တကယ်တမ်းတော့ ကျွန်တော့်ရင်ထဲမှာ ပြောစရာစကားတွေက ကုန်နေပြီ။ မဏ္ဍာပ်ပေါ်ကို ငဲ့ပြီး ကြည့်လိုက်တော့ ဧပရယ်က ကျွန်တော့်ကို လက်ယက်ခေါ်နေပြီလေ။

………………………………….။……………………………………

အတိတ်ဆိုတာကို အတိတ်မှာပဲ ချန်ထားသင့်ခဲ့ပေမယ့် အမြဲတမ်း တူးဆွအသက်သွင်းနေမိတဲ့ ကျွန်တော့်အတွက် ဒဏ်ယာဟောင်းကို ပွတ်သပ်နေမိတာ ဘာဆန်းလဲ။ ရူးတယ်လို့ပဲ ဆိုချင်ဆိုပါတော့။ တစ်စက်တစ်စက်ချင်းဆီ ကျလာတဲ့ ရေမှုန်တွေ အောက်မှာ ဘာရယ်မှန်း မသိ။ ပိုပိုပြီး မွန်းလာတယ်။ နောက်တော့ မဏ္ဍာပ်အနောက်လှေကားကဆင်းပြီး အင်းယားရေစပ်မှာ သွားထိုင်နေမိသည်။ ဒီနေ့ကျမှ အင်းယားရေပြင်က လှိုင်းကြပ်ခွပ်တွေ ပိုပြီး ထနေသယောင်။

အင်းယားရေပြင်ကို ငေးကြည့်နေချိန်မှာပဲ ဧပရယ်က ကျွန်တော့်ဘေးနား ရောက်လာ၏။ လက်ထဲမှာလဲ စားစရာတွေ ပါလာသည်။ စားစရာတစ်ချို့ကို ကျွန်တော့်လက်ထဲကို ကမ်းပေးလိုက်ရင်း ဘေးနားမှာ ကပ်ထိုင်လိုက်၏။ နောက်တော့ ဘာရယ်မဟုတ် ဟိုဟိုဒီဒီ ပြောနေကြရင်း ဧပရယ်က ကျွန်တော်ကို ရည်းစားရှိလားလို့ မေးလာသည်။ ကျွန်တော်ကလည်း ရှိတယ်။ သင်္ကြန်ပြီးရင် ရန်ကုန်ကို လိုက်လာလိမ့်မှာလို့ ပြောလိုက်သည်။

ဧပရယ်က ရည်းစားဓါတ်ပုံရှိရင် ပြပါလားတဲ့။ ကျွန်တော်လည်း ဟန်းဖုန်းထဲမှာ သိမ်းထားတဲ့ ရည်းစားပုံတွေကို ပြလိုက်တယ်လေ။ သူမက တမြေခြားက ကျွန်တော့် ချစ်သူပုံကို ကြည့်ပြီး ချောလိုက်တာတဲ့။ ဟုတ်တယ်။ ချောတယ်။ သူ့နာမည်က ချူးတဲ့။ ဧပရယ်က တွေတွေလေးဖြစ်သွားပြီး ပုသိမ်မှာ သွားတွေ့မယ်ဆိုတာကရော ဘယ်သူလဲတဲ့။

ဒီတစ်ခါတော့ ဒီမေးခွန်းကို တော်တော်ဖြေရခက်သွားတယ်။ သူနဲ့ ကျွန်တော်နဲ့က ဘာတွေလည်း။ တကယ်တမ်းကျတော့ သူငယ်ချင်းတွေပါပဲ။ သူ့ဆီမှာလည်း ချစ်ရမယ့်သူနဲ့…. ကျွန်တော့်ဆီမှာလည်း လက်တွဲရမယ့်သူနဲ့……..။ သက်ပြင်းခပ်ပါးပါးလေးကို မှုတ်ထုတ်လိုက်ရင်း……… သူငယ်ချင်းတွေလိုပါပဲလို့ ဖြေလိုက်မိသည်။

ဧပရယ်က ကျွန်တော့်ကို မျက်တောင်ကော့လေးတွေနဲ့ ငေးကြည့်လိုက်ရင်း…….. တကယ်လို့ ကျွန်တော့်ဘ၀မှာ ပြောင်းလဲလို့ရရင်…….. ပုံမှန်ဘ၀တစ်ခုကို တည်ဆောက်နိုင်မယ် ဆိုရင် ဘယ်လိုလုပ်မလဲ ဆိုပြင်း လေးလေးနက်နက် မေးလာတယ်။

ဒီလို ပုံမှန်ဘ၀ကို ပြန်ရောက်ဖို့ ဧပရယ့်ဘက်က စွန့်စားပြီး ကျွန်တော့်ကို ကယ်တင်ချင်တာလား။ တကယ်တော့ ပုံမှန်အခြေအနေကို ပြန်ရောက်ဖို့ဆိုတာ လုံးဝမဖြစ်နိုင်တော့တာ ဧပရယ်ရယ်……. မရူးချင်စမ်းပါနဲ့တော့။

အဲဒီညက တော်တော်နဲ့ ကျွန်တော် အိပ်မပျော်နိုင်ဘူး။ ပူပြင်းလှတဲ့ နွေညတစ်ညကို ခက်ခက်ခဲခဲ ဖြတ်သန်းရသလို ရင်ထဲမှာ တငွေ့ငွေ့ လောင်ကျွမ်းနေတဲ့ သံယောဇဉ်မီးကလည်း ပြင်းလွန်းလှပါသည်။ မနက်ဖြန်ဆို သင်္ကြန်အတက်နေ့။ ကျွန်တော် ဘယ်အချိန် ပုသိမ်ရောက်မလဲဆိုတာ အခုထက်ထိ ဖုန်းဆက်မေးဖော်မရ။ သူမဆက်တော့လည်း ကိုယ်ပဲဆက်ရတော့မယ်လေ။

သူနဲ့ အဲဒီနေ့ညက ဖုန်းပြောရတာ တကယ်ကို မမေ့နိုင်တော့။ ကျွန်တော်က မနက်ဖြန်ကျရင် ရဲမင်းပါ လာလိမ့်မယ် ဆိုတဲ့ အကြောင်းကို သူ့ကို ပြောပြလိုက်သည်။ နောက်ပြီး ရဲမင်းကို ကျွန်တော် ပြောပြတဲ့ အကြောင်းလည်းပါတာပေါ့။ ဒီတစ်ခါ သူ့ဘက်က တုန့်ပြန်မှုတွေက အေးစက်စက်။ ရဲမင်းနဲ့ ပါတ်သက်ပြီး ပြဿနာ တစ်ခုလို ကျွန်တော့်ဘက်က ဖြစ်နေတာတွေကို သိရဲ့သားနဲ့ မသိချင်ယောင်ဆောင်နိုင်လွန်းအားကြီးလာသည်။

မင်း…. ငါနဲ့နှစ်ယောက်တည်း တွေ့ဖို့ကို ဘာလို့ အဲဒီလောက်တောင် စိုးရိမ်နေရတာလဲ။

ကျွန်တော့်ဘက်က အမေးရှိပေမယ့် သူ့ဘက်က အဖြေမရှိခဲ့ဘူး။ တကယ်ကို သူ့ဘက်က ငြိမ်သက်လွန်းအားကြီးလာသည်။ အခြေအနေတစ်ခု ဖန်တီးခဲ့နိုင်မယ်။ တကယ်လို့သာ ကိုယ့်ရှေ့မှောက်မှာ သူရှိခဲ့မယ်ဆိုရင် တစိတ်လောက်တော့ ငါ့ကို နားလည်ပေးစမ်းပါ။ ငါ့အတွက် အချိန်နည်းနည်းလေးပဲ ပေးစမ်းပါ……….။ အဲဒီအတွက် တစ်သက်လုံး အမှတ်တရ သိမ်းသွားမှာပါဆိုပြီး ဒူးဖက်တောင်းပန်ပြီး အလျှော့ပေးချင်သူ တစ်ယောက်ပါ။

တစ်ချိန်တုန်းက ကျွန်တော်နဲ့ ဖုန်းဆက်ရဖို့ သူ့ဘက်က ဘယ်လောက် စွန့်စားခဲ့ရတာ သူမေ့နေပြီလား။ သူနဲ့သာ ဖုန်းပြောခွင့်ရတဲ့ တနင်္ဂနွေနေ့တွေတိုင်းမှာ ဖုန်းနားမှာ သူဖုန်းဆက်မယ့် အချိန်ကို မသိဘဲ ကျွန်တော် တစ်နေကုန် စောင့်နေခဲ့ဖူးတာရော မှတ်မိသေးရဲ့လား။ ဟိုး.. အဝေးဆုံးတစ်နေရာဆီမှာ ဝေးနေပေမယ့် ကျွန်တော် နေ့စဉ်ရေးခဲ့တဲ့ စာတွေကရော၊ချောင်တစ်ခုမှာ အမှိုက်အိတ်တစ်ခုလို စွန့်ပစ်ခြင်းခံလိုက်ရပြီလား။ အခုတော့ နှစ်ယောက်စလုံး ပြောစရာ စကားတွေ မကျန်တော့။

မင်း……. ငါ့ကို…. မလာစေချင်ဘူးမလား……..။

………………………………
………………………………

အင်း.........။

ဒီတစ်ခါတော့ ကျွန်တော် ဒီအဖြေကို မျော်လင့်ပြီးသားပဲလေ။

ငါ… မင်းနဲ့ ဒီတစ်ကြိမ် နောက်ဆုံး တွေ့ချင်ပေမယ့်……. ဘယ်လိုမှ မဖြစ်နိုင်တော့ဘူး……။ ဒါပေမယ့် .. မင်းကို ပြောပြချင်တဲ့ စကားလေး ရှိခဲ့တယ်။……. အဲ့ဒါက မင်းကို ငါချစ်နေတယ်ဆိုတာပဲလေ။ …….. ပထမဦးဆုံး …. ဖြစ်သလို……. ဘယ်တော့မှ…. ထပ်ပြီး မပြောတဲ့ နောက်ဆုံး စကားပါ……..။ ကံကြမ္မာက အလှည့်ပေးလို့ ဒို့နှစ်ယောက်ပြန်ဆုံ ဖြစ်ရင်တော့…. သူငယ်ချင်းတွေပဲပေါ့………။ ဒီနေရာကပဲ… ငါနှုတ်ဆက်ခဲ့ပါတယ်…………..။ တစ်ချိန်ချိန်မှာ လိုအပ်ခဲ့ရင်တော့ ငါ…………… အမြဲတမ်း သူငယ်ချင်း တစ်ယောက်လို မင်းနံဘေးမှာ ရှိနေဦးမှာပါ…….. တို့နှစ်ယောက်က မင်း အမြဲတမ်း ပြောတဲ့ … အချစ်ဆုံးသူငယ်ချင်းတွေပဲလေ….. ဟုတ်တယ်မလား…………………..။

………………………………………..
………………………………………..။

တီ….. တီ…… တီ…. ဆိုပြီး တစ်ဖက်က ဖုန်းချသွားချိန်မှာ ကျွန်တော် ဆက်ကိုင်ထားမိနေဆဲ။ ဒီတစ်ခါတော့ ပူနွေးတဲ့ မျက်ရည်စတို့ ပါးထက်ကို အရင်လို မစီးကျလာတော့။ ဆယ်နှစ်တောင် ကြာပြီဆိုတော့ ခမ်းခြောက်သွားပြီ ထင်ပါရဲ့။ ဖုန်းလေးကို ဆက်ကိုင်ထားရင် အဝေးကို ငေးကြည့်မိလိုက်တဲ့အချိန်မှာ တစ်မြို့လုံး မှောင်အတိကျသွားတယ်။ ရန်ကုန်မီးလိုပဲ ပြန်လင်းလာဖို့ဆိုတာ အတော့်ကို ခဲယဉ်းသွားပြီလေ…..။

ဆက်ပါဦးမည်။
သရုပ်ဖော် 3D Model ကိုယ်တိုင် ပြုလုပ်၏။